Undas sa Lapulapu hapsay

CEBU - Hapsay ang pagsaulog sa duha ka adlaw'ng Undas sa dakbayan sa Lapulapu bisan pa nga adunay gamay'ng tensyon sa mga vendors ug mga awtoridad sa sam-ang sa Humay-humay atol sa unang adlaw sa kasaulogan. Matud pa ni Lapulapu City Police OIC Director Sr. Supt. Mariano Natu-el Jr. hapsay ang tulo ka mga dagkong sam-ang sa dakbayan sa Lapulapu, ang sam-ang katoliko sa Humay-humay, Protestanteng sam-ang sa, Gun-ob ug ang Mactan Memorial Gardens sa Marigondon.

Matud niya nga ang katawhan sa Lapulapu naedukar na sa maong kalihukan nga kinahanglan nga walay magdala og mga mahait nga hinagiban apan duna say nakuhaan og bino.

 Mapasalamaton usab si Natu-el sa mga vendors nga mikooperar usab sa mando gikan sa Parish Pastoral Council sa kamanduan nga walay mga vendors nga pasudlon sud sa sam-ang sa Humay-humay.

Apan sa sayo pa, naobserbahan sa Banat News niadtong Sabado diriyot nagubot ang mga polis, tanod ug mga BIN dihang sila gisukmatan sa mga vendors nga anaa sud sa sam-ang sa Humay-humay.

 Kini tungod sa ilang pagpatuman sa palisiya sa PPC nga way tugutang makabaligya sa sulod, apan gikasuko kini sa mga vendors kinsa dugay nga nanginabuhi diha sa sulod ilabi na panahon sa kalagkalag.

Hinuon sa kadugayang hangyo nisugot ang mga vendors nga adto nalang sa gawas uban sa vendors nga anha naninda sa gawas, ang pagpagawas kanila nakapaluag hinuon sa sulod sa maong sam-ang. – BANAT NEWS