CEBU - Gikalipay ni acting Mayor Michael Rama nga mahibalik na si Mayor Tomas Osmeña dinhi sa dakbayan niining semanaha.
Sa iyang text message nga gipadangat ug nadawat usab ni Rama, gipahibawo sa mayor nga siya nia sa Sugbu karong umaabot nga Biyernes.
Kini alang usab sa pagpadangat sa iyang State Of the City Address (SOCA) ug sa uban pa niining mga gimbuhaton.
Ang mga doktor sa mayor didto sa Estados Unidos giingong mihatag kaniya og “go signal” alang sa pagpauli dinhi sa Sugbu.
Matud ni Rama nga ang pagpauli ni Osmeña nagpasabot lang nga dili ingon niana ka seryoso ang sakit niini ug kini ilang gikalipay.
Una nang gikataho nga dunay sakit nga cancer ang mayor mugna sa bugon nga mitubo sa iyang pantog hinungdan nga kini niadto sa Amerika.
Kini aron mapaubos sa sunod-sunod nga medical examination ug mapahigayon ang angayan nga buhaton sama sa operasyon.
Sa ipadangat unya nga SOCA ni Osmeña kini gituohang dunay maayong mga kalambuan nga ipadangat ngadto sa mga Sugbuanon.
Kini tungod usab sa giluwatang pamahayag ni City Administrator Francisco Fernandez pipila ka buwan na ang nakalabay.
Ang City administrator miingon nga mopadangat lang ang mayor sa iyang SOCA kun mahalin na ang South Road Properties (SRP).
Gani niadto pang buwan sa Agosto ang target sa kagamhanan sa dakbayan pagbaligya sa SRP apan hangtod karon wala pay bidding nga napahigayon.
Hinuon ang proposal sa Filinvest Land Incorporated gi-review na sa Joint Venture Committee (JVC) nga gipanguluhan ni Fernandez.
Ang Filinvest interesadong mopalit og napulo ka ektarya sa SRP gawas sa paggamit og laing 40 ka ektarya niini pinaagi sa pagpakig-joint venture sa siyudad. – BANAT NEWS