CEBU - Gitagalan lang og duha ka semana ni acting Mayor Michael Rama si Cebu City Police Office (CCPO) Director Senior Superintendent Patrocinio Comendador paghimo og tukmang lakang sa iyang gisugyot niini.
Gusto ni Rama nga ilisan ang mga hepe sa duha o tulo ka police station sa siyudad tungod sa iyang pagtuo nga kini dili angayan sa katungdanan.
Kini human usab ipatawag sa acting mayor niadtong miaging semana ang onse ka station commander sa dakbayan.
Nasuta ni Rama nga ang duha o tulo ka station commander walay kapasidad ug walay kapabilidad nga mangulo sa ilang presinto.
Dihang nakuhaan og reaksyon si Comendador sa pamahayag sa acting mayor hugot niining gipanalipdan ang iyang mga sakop.
Matud ni Comendador nga siya maoy personal nga nipili sa mga station commander ug iyang gisiguro nga kini dunay igong kasinatian pagpakigbatok sa kriminalidad.
Gani gipasigarbo pa sa CCPO director nga bisan og dili mga colonel ang iyang mga station commander, giingong dili usab mabintahan ang “level of competence” niini.
Apan wala magostuhi sa acting mayor ang pamahayag ni Comendador ug mihatag lang og duha ka semana niini paghimo sa tukmang lakang.
Matud ni Rama nga iya nang nasultihan ang CCPO director sa iyang gustong mahitabo ug anaa na niini ang paghimo og kausaban.
“I hope nga iyang hatagan og pagtagad kay I am serious sa akong gisulti niya, gikinahanglan gyud nga naa siya'y himoong lakang,” sumala ni Rama.
“Angayan niyang masayran nga nakatangtang na ko kaniadto og director sa atong kapolisan sa siyudad,” dugang pamahayag sa acting mayor.
Nasayran nga sa matag duha ka semana makigtagbo si Rama sa tanang mga station commander sa dakbayan alang sa pagtuki sa mga kalihukan niini.
Gipaabot ni Rama nga sa ilang panagtagbo sa sunod semana, bag-o na ang hepe sa mga police station nga iyang gusto nga pailisan ang station commander. – BANAT NEWS