CEBU - Tulo ang naangol sa dihang gipusil sa usa ka polis ang duha ka mga armadong lalaki nga nagbahasbahas ug misukol sa dihang gibadlong didto sa sementeryo sa barangay Taytay, siyudad sa Danao kagahapon sa 1:55 sa kaadlawon atol sa selebrasyon sa Kalag-kalag.
Ang mga naangol mao ang mga suspek nga sila si Marc Juda Batiquin Ramonida, 24, walay klarong trabaho ug molupyo sa nahisgutang lugar, Junriel Bentoy, 19, ulitawo, walay klarong trabaho ug molupyo sa Tabok Kamalig Bato ug napagan usab ang usa ka Jonas Larase Somera, 19, 4th year high school ug igo lang nanagkot sa lubong sa iyang paryente niadtong tungura.
Matud ni PO1 Marlon Remollo sa Danao City Police Station dihang nahinabi sa Banat News subay sa blotter nga gibasehan niini ang mga tanod nga gipakatap sa maong sam-ang nakadungog kini og mga butobuto sa armas hinungdan nga nangayo kini og panabang ngadto kang PO3 Rochelle Arquiza sa Regional Intelligence Office sa PRO-7 apan didto sa sementeryo nanagkot sa lubong sa iyang mga mahal sa kinabuhi nga mitaliwan na.
Giubanan ni PO3 Arquiza ang mga tanod paingon sa sulod nga bahin sa sam-ang diin maggikan ang butobuto sa armas ug pag-abot sa lugar naabtan nila ang suspek nga si Ramonida apan misuway kini og sukol hinungdan nga gipusil ug naigo sa iyang tuong bahin sa lawas.
Ihatod unta nila ni PO3 Arquiza uban sa mga tanod ang naangol apan laing butobuto sa armas ang ilang nabati hinungdan nga nagpabilin si PO3 Arquiza ug ang mga tanod na lang ang gipalahos og hatod sa suspek didto sa Danao District Hospital.
Subling gisusi ni PO3 Arquiza ang lugar diin maggikan ang buto boto sulod gihapon sa maong sam-ang ug didto iyang naabtan ang suspek nga si Junriel Bentoy nga nagbitbit og armas nga walay lisensya ug gimanduan kini sa pag-surrender apan misukol hinuon kini ug mibalos pagtion hinungdan nga gipusil ug maayong pagkaigo sa tiyan nga nilapos sa bukobuko niini.
Samtang napagan usab sa maong panghitabo ang usa ka batan-on nga si Somera nga nakaangkon og samad pinusilan sa iyang tuo nga tiil gikan sa saag nga bala ug pulos gipangdala sa Danao District Hospital apan sila si Ramonida ug Bentoy gi-refer sa Vicente Sotto Memorial Medical Center (VSMMC).
Si PO3 Arquiza mi-turn-over sa kapolisan sa Danao og kalibre .45 nga dunay unom ka bala sa magazine niini nga iyang na-recover gikan sa posesyon sa suspek ug samtang si SPO2 Ramir Oliverio naka-recover usab og .357 rebolber nga dunay tulo ka basiyo sa bala sulod sa cylinder niini. – BANAT NEWS