Manimbahay naligsan

CEBU - Dead-on-arrival sa Bogo District Hospital ang usa ka 59-anyos nga ginang kinsa padulong untang mosimba apan naligsan na hinuon sa usa ka towing truck niadtong Biyernes sa kaadlawon sa National Highway sa barangay Lapaz dakbayan sa Bogo.

Ang namatay giila nga si Joveta Lasdose, taga barangay Malingin sa nahisgutang dakbayan human usab grabing kadaot sa ulo tungod sa maong aksidente.

Matud pa ni PO3 George Ocena sa Bogo Police Station nga gikahinabi sa Banat News gimaneho ni Danilo Omandac, 36, taga barangay Dalingding Norte lungsud sa Daanbantayan ang maong sakyanan nga naguroy og naaberyang L300 Van nga may plakang GRD-926.

Ang biktima padulong mosimba sa Nazareth Church apan naigo sa giguroy nga van sa maong tow truck, gitabang unta kini ug gidala sa tambalanan apan patay na kini.

Ang driver nga si Omandac mitahan sa kapulisan sa Medellin human usab siya gipahibalo sa usa ka driver sa habal-habal nga aduna siya’y naligsan nga usa ka tiguwang nga babaye.

Hinuon si PO3 Osena, nitug-an nga ang driver gi-release human usab kini magkasabot sa pamilya sa namatay. – BANAT NEWS