CEBU - Nakalingkawas sa tinong kamatayon ang usa ka 11-anyos nga batang lalaki human kini maigo sa saag nga bala gikan sa duha ka mga way lingaw nga mga suspetsadong nagsakay og motorsiklo nga kalit lang namusil niadtong Biyernes sa gabii sa barangay Canduling lungsod sa Ronda.
Ang nalandig sa tambalanan giila sa kapulisan nga si Nick Villagonzalo, nagpuyo sa nahisgutang barangay tungod sa samad pinusilan sa buko-buko.
Sa report nga nadangat sa Operation sa Cebu City Police Office ang biktima uban sa iyang maguwang babaye nagbarog daplin sa dalan diha sa ilang lugar dihang kalit lang nibutho ang duha ka suspetsado nga nagsakay og motorsiklo.
Matud pa nga dihang naabot sa ilang tungod ang duha, ang backrider kalit lang nipabuto makausa ka higayon sa wala matinong kalibre sa armas tumong ka sementadong karsada.
Ang 11-anyos kinsa diha ra sa tungod nga nagbarog naigo sa splinter sa maong armas hinungdan nga gidali kini sa pagdala sa tambalanan.
Ang mga suspetsado dali kaayong nakapaturatoy sa pagpadagan sa ilang motorsiklo palayo sa maong dapit. – BANAT NEWS