Karaang ordinansa nalilian ni Edgar

CEBU - Giangkon ni Cebu City Councilor Edgardo Labella nga nataligam-an ang ordinansa sa dakbayan nga nagdili pagtukod og building o pinuy-anan duol sa mga sam-ang ug gani P10 lang ang multa niini.

Ang City Ordinance 173 nga napanday niadtong tuig 1953 nagdili sa bisan unsang building construction sulod sa 25 metros nga radius gikan sa naestablisar nga sementeryo.

Dunay P10 ngadto sa P200 nga multa ang makalapas sa ordinansa ug mahimong mabilanggo hangtud sa unom ka buwan kun mapamatud-ang sad-an. Matud ni Labella nga bisan gani sa multa makita nga labihang karaana na sa ordinansa tungod kay wala na gani P10 nga denomination karon.

Ang konsehal nga maoy chairman sa Committee on Laws and Ordinances sa City Council mapasalamaton sa Banat News nga gipahinumduman sa nahisgutang ordinansa.

“Maayo nga natuki na karon aron atong matan-aw kung unsaon nato na pagpahaom sa kasamtangan natong sitwasyon, kinahanglan ba na nga amendahon,” sumala ni Labella.

“Dili man malimod nga daghan kaayong mga structures karon duol sa mga sam-ang, ang uban anaa na gyud nagpuyo sa mga nitso uban sa mga patay,” dugang pamahayag niini.

Partikular nga mga sam-ang nga gihinganlan ni Labella nga gipuy-an usab sa mga buhi mao ang Chinese Cemetery ug ang Lorega San Miguel.

Gipasalig ni Labella nga ilang tun-an ang ordinansa ug posibleng kini dugangan og mga probisyon aron ma-regulate ang mga namuyo niini.

Giangkon sa konsehal nga lisod nang mapahawa ang mga nagpuyo diha sa mga sam-ang kung walay mahatag nga relocation site ang dakbayan ngadto kanila. – BANAT NEWS