Mga traysikol sa M'daue gidid-an sa mga sam-ang

CEBU - Mga traysikol ug traysikad sa dakbayan sa Mandaue padayon sa pagsubay sa naandan nilang mga dalan sa dakbayan sa Mandaue gawas lamang sa ilang pagbiyahe paingon sa sementeryo sa barangay Guizo sa kasaulogan sa All Saints Day ug All Souls Day.

Si Domingo Cortes nga nahinabi sa Banat News miingon nga ang mga traysikol nga nagbiyahe sa barangay Maguikay nga mopaingon sa merkado publiko adto mosubay sa naandan nilang agianan apan dili kini makalabay sa atubangan sa sementeryo paingon sa A.S. Fortuna Extention.

Si Cortes miingon nga dili maapektohan ang biyahe sa mga traysikol sa barangay Labogon, Paknaan, Umapad ug Opao sanglit anaa gihapon sila moagi sa naandan nga mga dalan nga ilang agianan.

Samtang ang mga traysikad gidid-an gihapon sa pagsulod sa merkado publiko sa barangay Centro hangtod na sa pag-agi sa mga dalan nasyonal alang sa paglikay sa aksidente.

Ang barangay Looc, Cambaro ug silingang mga sitio sa gihapon normal ang pagbiyahe ngadto sa ilang destinasyon sa Ouano Wharf sa barangay Looc.

Ang mga traysikol nga nagbiyahe sa Cabancalan, Casuntingan paingon sa eskina barangay Talamban pabilin sad sa normal nilang rota. – BANAT NEWS