CEBU - Gitugot ni Gobernador Gwendolyn Garcia nga tunga ra sa adlaw ang trabaho sa mga kawani sa Kapitolyo kagahapong adlawa aron makapauli sila og sayo sa ilang tagsa-tagsa ka lugar sa probinsya sa Sugbu aron makabisita sa mga mitaliwan nilang minahal sa kinabuhi atol sa Kalag-kalag karung adlawa ug ugma.
Napanglantawan ni Bise Gobernador Gregorio Sanchez Jr. kinsa maoy nipirma sa kamandoan niadtong milabay’ng Martes nga maglisod unya og sakay ang mga kawani pabalik sa probinsya.
Nunot niini, ang mga kawani ug mga opisyales sa Kapitolyo nahinangop sa gibuhat ni Sanchez sanglit makapamauli sila og sayo-sayo atol sa Kalag-kalag.
Kasagaran sa mga kawani taga probinsya sa Sugbu ug nag-abang lang og kapuy-an dinhi sa dakbayan sa Sugbu.
Samtang sa laing bahin kagahapon sa buntag si capitol consultant on security nga si Byron Garcia nihimo’g round-up diha sa Cebu South Bus Terminal sa pagsiguro sa seguridad sa mga pasahero ug aron usab sa pagplastar sa mga gwardya sa maong terminal.
Usa sa gisiguro di mahitabo mao ang mga insidente sa pagpanguot sa mapa-himuslanong mga tawo sa higayon ang mga pasahero nga maglinya sud ug sa gawas sa terminal. – BANAT NEWS