Mang-tripping og manag-uyab 'sikop

CEBU - Sa katapusan nahipos ra sa mga awtoridad ang usa ka tawo sa Lapulapu City kinsa manigbas kun makakita og mag-uyab nga mag-date.

Si Rolan Estellore, hingkod ug ulitawo nga taga barangay Ibo, Lapulapu City didto hidakpi sa Pasil, Cebu City niadtong Martes sa gabii.

Ang pagsikop kang Estellore gihimo sa kapolisan sa dakbayan sa Lapulapu human niya tigbasa patay si Cresus Palipte Malacaste, 30, ulitawo, nga nagtrabaho sa dakbayan sa Lapu-lapu apan lumad nga taga Asturias , Cebu.

Si Malacaste ug ang uyab niini nga si Lorna Contimido Baunsit nag-date ilawom sa kahoy sa barangay Ibo, niadtong miaging gabii, dihang gitigbas kini sa suspetsado ginamit ang hait kaayong sundang.

Nasabak ang biktima sa ulo, hinungdan sa hinanaling kamatayon niini.

Matud pa ni Baunsit nga malipayon kaayo silang nagsabotsabot sa ilang kaugmaon dihang kalit lang mitunga ang suspetsado ug sa walay hinungdan, kalit lang gibugha ang ulo sa biktima.

Si SPO2 Rolito Jumao-as sa Lapulapu City Police Office mibutyag sa Banat News nga wala makaila si Baunsit sa nagtigbas kang Malacaste nga iyang uyab.

Apan usa ka sakop sa barangay intelligence network (BIN) sa Ibo maoy nag-text sa buhatan sa kapolisan sa Lapu-lapu City nga nagpahibawo nga ang tawong mipatay kang Malacaste tua sa barangay Pasil, Cebu City.

Dihadiha gilusad dayon sa kapolisan ang “hot pursuit” operation batok sa suspetsado ug didto nasakpan nila kini.

Apan nasuta sa mga awtoridad nga may deperensya sa pangutok ang suspetsado kay ang bisyo niini mao ang pag-among-among ug pagpatay sa mga mag-uyab nga makit-an niyang mag-date.

Gani may mga saksi nga miila kang Estellore nga mao usab kini ang mitigbas patay sa mag-uyab gihapon nga nag-date ilawom sa 2nd Mactan –Mandaue Bridge duha na ka buwan ang nakalabay. – BANAT NEWS