Watchman sa quarry gipatay

CEBU - Gipusil-patay ang usa ka magbalantay nga migawas sa iyang trabahoan aron mopalit og softdrink sa tindahan atbang sa quarry site nga iyang gibantayan sa barangay Lutac siyudad sa Naga niadtong Huwebes sa alas 8:00 sa gabii.

Ang biktima nga nakaangkon og lima ka samad pinusilan sa dughan ug kalawasan mao si Dionisio Geraldez, molupyo sa barangay Pangdan ug nagtrabaho isip watchman sa FDR Construction Firm nga nagbase sa maong lugar.

Matud ni PO1 Ken Cabrera sa Naga City Police Station dihang nahinabi sa Banat News usa ka 10-anyos nga bata nga gipalitan sa biktima og softdrink maoy nakakita sa hitabo.

Nigawas sa gibantayan nga quarry site ang biktima ug gibilin ang kauban niini nga si Resindo Pacaña.

Matud pa sa bata human niya mahatagi og softdrinks ang biktima ug sa dihang milakaw na kini balik sa quarry site kalit lang nipaka ang lima ka sunod-sunod nga mga buto sa armas.

Dihang gitan–aw sa bata ang gigikanan sa buto nakit-an nalang niyang nagbuy-od na sa daplin sa karsada ang biktima pipila ka metros lang ang gilay-on gikan sa tindahan.

Pakyas hinuon ang bata pag-ila sa mga mamumuno sanglit giingong wala gyud niya kini makiti.

Gitabang unta sa kauban ang biktima ug gidala sa Minglanilla District Hospital apan gideklarar kini nga dead on arrival sa mga doktor tungod sa naangkong daghang samad pinusilan sa dughan ug kalawasan.