Ban-Tal flyover gisubhan ni GMA

CEBU - Human sa kapin 300 ka adlaw nga pag-antos sa kahuot sa trapiko diha sa Banilad-Talamban Road pormal nang gibuksan kagahapon ug mismong si Presidente Gloria Macapagal Arroyo pa maoy misubo pagbukas sa P87 milyones nga flyover.

Bisan paman sa pagsigeng bunok sa uwan gipadayon ni Arroyo ang pagbukas sa maong flyover nga ginganlan na karon og Governor Cuenco flyover.

Si Cebu City North district Rep. Raul del Mar nga maoy nangita og pundo alang niini mibutyag sa presidente nga dako kini og matabang sa negosyo ug ekonomiya sa siyudad.

Ang maong flyover natapos og sayo ug gipaabot nga makatabang og dako sa kapin 150,000 ka mga residente sa 15 barangays sa North district ug lakip na ang tanang mga di taga siyudad nga moagi niini.

Mipasalamat usab si del Mar sa mga motoristang misabot sa aberyang ilang nasinati samtang kini gihimo pa ug sa padayong pagpahigayon sa sumpay proyektong roadwidening sa maong dapit.

Sa pag-abot sa pangulo diha sa dapit dunay mga pundok sa kababayen-an ug kabataan gikan sa urban poor ang naglinya sa agianan niini ug gipunayan usab og pahiyom ug kaway-kaway sa pangulo.

Samtang si Cebu City Councilor Sylvan “Jack” Jakosalem kinsa maoy tsirman sa committee on energy, transportation, communication sa konseho nagkanayon nga dako gyud og matabang ang flyover ug kun matapos na sa hingpit ang road widening tungod kay ang isig ka habig niini two-lane man.

Kasamtangan pa gihapong gituki sa dakbayan ug ni del Mar ang isyu kabahin sa pagsupak sa pipila ka mga nanag-iya og luna nga maigo sa road widening tungod kay sagad kanila gustong bayran sila dayon og cash sa gobiyerno.

Sa pagkakaron padayon pa gihapon ang final-touches sa maong proyekto sama sa lamps, paintings, median curb, sewer drain pipes ug uban pa sumala pa sa Department of Public Works and Highways sa ilang Project Status Report.

“This will not solve the traffic entirely. But it will be minimized considerably. The congestion will be lessened but will not be entirely eliminated,” pagpasabot pang del Mar.

Usa nalang sa napanglantawang problema unya mao ang Talamban-Cabancalan Road ug Canduman-Pagsabungan road tungod kay piot pa gihapon kini kaayo ug daghang mga sakyanang mangagi matag adlaw.

 Hinuon daan nang may kamandoan si Arroyo ngadto sa DPWH sa pagpahigayon na og bidding alang sa himuong taytayan nga magsumpay sa barangay Canduman ug Cabancalan nga mobalor og P48 milyones.

Kini napanglantawang makapaluag sa trapiko sa lugar lakip na sa H. Abellana St. padulong sa Cebu City ug mga silingang lungsod anha agi sa Mandaue City. - Uban sa report ni Mitchelle Palaubsanon (BANAT NEWS)