CEBU - Walay supak ang kahugpungan sa mga manlalaban dinhi sa Sugbo niining pagdawat sa mga huwes sa allowance nga gihatag nila matag bulan gikan sa kagamhanan sa Probinsya ug siyudad sa Sugbo.
Ang Presidente sa Integrated Bar of the Philippines IBP-Cebu City Chapter Atty. Briccio Boholst dihang nahinabi sa Banat News nagkanayon dili kini dautan ilabina kay gitugutan kini sa balaod.
Apan nanghinaut ang IBP nga likayan lang sa mga huwes nga magpa-pressure o impluwensya sa ilang mga desisyon sa kaso ilabina kun dunay mga masang-at nga kaso sa ilang sala ang local nga kagamhanan nga maoy naghatagan nila sa maong insentibo.
Gihangop hinoon ni Boholst ang pagbalibad nila ni RTC branch 58 Judge Gabriel Englis ug RTC branch 13 Judge Meinrado Paredes sa allowance nga gihatag sa probinsya ug siyudad sa Sugbo ngadto kanila.
Ang Probinsya naghatagan og P6 mil nga allowance matag bulan sa mga huwes dinhi sa Sugbo samtang tag P5 mil usab ang gihatag nga allowance sa siyudad.
Alang kang Boholst usa ka dalaygong buhat ang nakab-ot nga desisyon nila ni Judge Paredes ug Judge Englis.
Samtang gihulagway sab ni Boholst nga dili makatarunganon ang gihimong pagputol ni Gobernador Gwendolyn Garcia sa allowance ni Judge Beinvenido Saniel sa probinsya human giingong gibasura sa naulahi ang kaso sa probinsya diha sa maong sala kun ugaling tinuod man kini.
Nitumaw ang maong kontrobersya human nitanyag si Mayor Tomas Osmeña og mga sakyanan sa mga huwes nga gipangkuhaan sa probinsya og sakyanan. – BANAT NEWS