CEBU - Duha ka adlaw ang ipatuman nga re-routing sa mga sakyanang pasaheroan sa Traffic Enforcement Agency of Mandaue (TEAM) atol usab sa Adlaw sa mga Kalag ug Todos Los Santos nga magsugod alas 6 ang takna sa buntag hangtod sa gabii sa Nobiyembre 1 ug 2.
Si Domingo Cortes nga maoy liaison officer sa TEAM nga nahinabi sa Banat News miingon nga maapektohan ang nagbiyahe sa Ibabao ug Ouano.
Matud pa niya nga ang mga PUJ nga gikan sa dakbayan sa Sugbo mosubay sa dalan A. del Rosario paingon sa dalan S.B. Cabahug sa Ibabao-Estancia.
Sa pagbalik niini sa dakbayan sa Sugbu adto gihapon kini mosubay sa dalan S. B. Cabahug apan mahimong moliko sa tuo sa dalan A.C. Cortes Avenue ug moliko sa wala sa dalan M.C. Briones paingon na sa dakbayan sa Sugbu.
Samtang ang mga PUJ nga nagbiyahe sa Ouano gikan sa dakbayan sa Sugbu ang adto kini mosubay sa dalan A. del Rosario ug moliko sa tuo paingon sa dalan S.B. Cabahug extension lahos na ngadto sa dalan Ouano Avenue.
Gikan sa Ouano adto kini moliko sa wala ug moliko na usab sa dalan J. Plaridel ug moliko na usab sa tuo sa dalan Catalino C. Ouano ug molahos na ngadto sa barangay Looc sa maong dakbayan.
Giawhag ang mga drayber pagsubay sa directional traffic signs nga ibutang sa kadalanan.
Samtang gatusan ka mga traffic enforcers ang ipakatap sa kadalanan sa samang adlaw tungod kay walay gitugutang maka-day off ang mga sakop niini aron makatabang sa problema sa trapiko sa maong adlaw. – BANAT NEWS