Lalis sa yuta misangpot pangluba pamubo asido

CEBU - Ang panaglalis sa managsilingan gumikan sa yuta nga gitukoran og balay misangpot sa pagpanunggab ug pagpanablig og muriatic acid.

Ang insidente nahitabo sa sitio Agus, barangay Agus, dakbayan sa Lapulapu niadtong miaging gabii.

Si Danilo Berdon, 43, residente sa maong lugar, nadunggaban sa iyang silingan hinungdan sa iyang samad nga naangkon sa walang kilid sa iyang lawas.

Ang nakadunggab kang Berdon giila sa kapolisan nga mao ang silingan niya nga si Danilo dela Rosa.

Si Berdon gidali pagdala sa Mactan Doctor’s Hospital apan luwas na hinuon sa makuyaw nga kahimtang.

Apan walay suwerte si dela Rosa tungod kay gibuboan kini og muriatic acid nga ipanglimpyo unta sa kasilyas.

Gitumbok ni dela Rosa nga maoy nagpanablig kaniya og asido ang asawa ni Berdon nga si Maria Lorna.

Si dela Rosa nakaangkon lamang hinuon og gamay kadaot gumikan sa asido.

Si PO3 Elmer Canillo sa Homicide Section sa Lapulapu City Police Office nagkanayon nga ila pang gitun-an kun kinsay pasakaan og kaso nilang Berdon ug sa asawa niini ug ni dela Rosa.

Matud pa ni PO3 Canillo nga nagkadeperensiyahay silang Berdon ug dela Rosa tungod sa yuta. – BANAT NEWS