CEBU - Usa ka konsehal sa Bien-Unido, Bohol napusilan sa mga sakop sa National Bureau of Investigation (NBI) kay giingong misukol ug nakigpinusilay dihang gironda ang iyang panimalay kagahapon sa kaadlawon.
Ang mga ahente sa NBI nga gipangulohan ni supervising agent Jose Ermie Monsanto armado og search warrant nga giluwatan ni Cebu Regional Trial Court (RTC) Judge Geraldine Faith Econg nga nagtugot nga siksikon ang balay ni Konsehal Regalado Bonado.
Si Bonado maoy presidente sa Association of Barangay Council sa Bien-Unido.
Nakadawat og report ang mga ahente sa NBI nga si Bonado may gitipigan nga mga armas nga walay lisensya didto sa iyang panimalay nga nahimutang sa barangay Nueva Esperanza, Bien-Unido, Bohol.
Ang mga NBI agents nga giingong gikalitan lang og pusil sa konsehal dihang misugod na unta sa pagsirkulo sa iyang balay, apan wala siya makaigo sanglit ngitngit pa ang panahon mga alas 4:30.
Tungod kay walay hunong ang pagpabuto ni Bonado, ang mga ahente sa NBI napugos sa pagbawos pagpabuto ug ang konsehal naigo sa luyong bahin sa iyang liog mao nga dali siya nga gidala didto sa Talibon District Hospital.
Tungod sa kaseryoso sa iyang samad, ang konsehal gibalhin sa Gallares Memorial Medical Center sa dakbayan sa Tagbilaran.
Nakuha sa NBI didto sa balay ni Bonado ang usa ka 45 kalibre nga pistola nga gitoohang maoy gigamit niini sa pakigpinusilay sa mga tinugyanan sa balaud.
Gawas sa 45 kalibre nga pistola, duna pay duha ka .38 kalibre nga revolver nga nasakmit didto sa balay.
Ang amahan sa konsehal nga si Roberto Bonado nadakpan usab sa mga ahente sa NBI nga giingong naghupot og .12 guage shotgun. Apan wala kini makigpinusilay sa mga NBI.
Gituohan usab nga si Bonado usa ka mamamarang kay nasakmit sa NBI gikan sa iyang balay ang kahimanan sama sa kalabera sa tawo, monyeka ug lista sa mga ngalan sa tawo nga gituohang iyang barangunon.
Matud sa NBI nga nakadawat sila og report nga ang amahan ug anak maoy gituohan nga nalambigit sa pagpatay sa usa ka konsehal sa barangay Nueva Esperanza, diin si Bonado maoy kapitan ug presidente sa Association of Barangay Councils.
Kagahapon sa hapon, ang NBI nag-andam na sa mga papeles nga ilang gamiton sa pagpasaka og kaso batok sa dinakpan nga konsehal ingon man sa iyang amahan. (BANAT NEWS)