CEBU - Gisuspenso ang ikaduha unta nga adlaw sa pagpahigayon og budget hearing sa kagamhanan sa dakbayan sa Sugbu alang sa 2009 annual budget.
Kini tungod kay giingong wala makapreparar ang 21 ka department heads sa City Hall sa pagpresentar ug pagdepensa sa ilang tinuig nga gahin.
Tungod niini, ang chairman sa Committee on Budget and Finance sa City Council nga si Konsehal Joey Daluz nitakda sa pagpadayon sa budget hearing unya sa Nobiyembre 4,5 ug 6.
Wala hinooy nakita si Daluz nga babag sa pagpalabang unya sa annual budget sunod tuig tungod kay giingong wala iapil niini ang capital outlay.
“Skin and bone policy ra man ning ato, so, dali ra ning maaprubahan kay ang mga plans and projects adto ra nato i-appropriate sa supplemental budget,” sumala ni Daluz.
Nasayran nga ang budget officer sa dakbayan nipadangat na atol sa unang adlaw sa budget hearing og P2.619 bilyones alang sa 2009 annual budget.
Samtang ang Local Finance Committee sa City Hall giingong duna lay P2.631 bilyones nga target collection niining tuiga.
Niingon hinuon si Daluz nga nipasalig na ang Local Finance Committee nga ilang makolekta ang target collection niining tuiga.
Gani ang komitiba nga gilangkuban sa City Treasurer, City Budget Officer ug City Planning Officer giingon ni Daluz nga malaumong mosobra pa sa target ang ilang makolekta.
“Niingon man atong local finance nga maybe mosobra pa sa target kay as of September duna na man silay nakolekta nga P2.2 billion nga actual collection,” matud ni Daluz.
Sa pikas bahin gipadayag sa konsehal nga madugangan pa unya ang kita sa dakbayan kung mahalin na ang South Road Properties (SRP).
Sa nasayran, duna nay pipila ka investor ang gikatahong nipadayag og interes sa SRP pinaagi sa pagpalit og luna niini . (BANAT NEWS)