CEBU - Gibati og kakuyaw ni Cebu City Councilor Arsenio Pacaña human masayod nga usa ka lokal nga produkto ang gikatahong dunay sagol nga melamine.
Ang melamine gikahadlukang masagol sa pagkaon human matino nga kini makadaot sa panglawas sa tawo ug maoy usa sa gitumbok nga hinungdan sa kidney failure.
Hinuon ang Department of Health (DOH) daling ni-ban sa pagpamaligya sa local product nga Sunflower Crackers Blueberry Cream Sandwich.
Kini human ipahibawo sa Hong Kong Center for Food and Safety nga usa ka matang sa Sunflower biscuit ang positibo sa melamine content.
Magpabilin ang pag-ban sa DOH sa nahisgutang produkto hangtud nga kini mapaubos sa pakisusi sa Bureau of Food and Drugs (BFAD).
Matud ni Pacaña nga angayang susihon sa hingtungdang mga ahensya ang tanang lokal nga mga produkto aron sa pagtino nga kini dili makadaut sa mga konsumidor.
Isip chairman sa Committee on Trade and Commerce sa City Council mipahimangno kini sa publiko nga magmatngon sa pagpalit og pagkaon.
“Wala gyud tay laing mahimo ani, mag-amping na lang ta kay hasta diay atong mga local food products dunay sagol nga makadaut nga chemical,” sumala ni Pacaña.
Sa samang higayon nanawagan usab ang konsehal ngadto sa mga local manufacturer nga siguruhon niining dili makadaut sa mga konsumidor ang ilang baligya nga mga produkto.
Nasayran nga ang BFAD nahuman na sa ilang gihimo nga testing sa kapin sa 200 ka mga China-made dairy and meat products.
Ang nahisgutang ahensya gikatahong nakadiskubre og mas taas nga melamine level sa tulo ka klase sa biscuit nga Lotte.
Kini mao ang Lotte B+W Koala Biscuit, Lotte Chocolate Snack Koala Biscuit ug Lotte Strawberry Snack Koala Biscuit.
Gawas niini may nakita usab ang BFAD nga taas nga melamine content sa tulo ka China-made milk products gikan sa Jolly Cow Slender High Calcium Low Fat Milk (1 liter), Greenfood Yili Fresh Milk, ug Mengniu Drink. (BANAT NEWS)