CEBU - Gihulagway ni San Fernando Mayor Lakambini Reluya nga pamulitika ang motibo sa pagbalik-balik sa isyu sa pagdonar sa mga computer units alang sa mga tinun-an sa ilang lungsod nga giagi sa iyang buhatan.
Ang maong isyu napatik sa internet nga may website nga taga San Fernando.blog.com diin gituki nga gihimulbulan una sa mga tawo sa mayor ang mga computer units sa wala pa kini itugyan ngadto sa benepisyaryo niini.
Kini human gibutyag ni Reluya nga iya nang na-turn-over ang mosobra sa 200 ka mga computer units ngadto sa Sangat National High School nga maoy benepisyaryo sa maong mga computer ingon man mga libro nga gidonar sa kanhi molupyo sa ilang lugar nga si Steve Enad nga atua na manimuyo sa Amerika ug usa na ka U.S. citizen.
Gipasabot ni Reluya nga dugay na niyang natugyan ngadto sa nahisgutang tunghaan ang maong mga computer units ug mga libro human kini miabot sa milabay pang tuig apan naglibog siya kun nganong padayon nga gihimong isyu ang maong panghitabo nga unta wala may bisan usa ka dako nga nausik gikan sa panudlanan sa lungsod.
Gitug-an sa mayor sa dihang nahinabi sa Banat News nga siya pa gani ang personal nga migasto sa bayranan aron ma-release ang maong butang diha sa Bureau of Customs nga miabot og P49 mil wala pay labot sa gasto sa trucking nga miabot og P15.
Hinuon giangkon sa mayor nga ang Sangat National High School maoy consignee sa maong mga butang apan gihatagan siya og katungod sa donor niini nga maoy moasikaso pagkuha niini sa Customs ug mo-apod apod ngadto sa mga benepisyaryo niini.
Tungod niini, kumbinsido si Reluya nga dunay nagpahipi nga pamolitika ning maong kanunay nga pagbanhaw sa maong isyu nga dugay na nga nahitabo ug labaw sa tanan walay anomaliya nga natigayon.
Wala hinuon magtumbok ang mayor kun si kinsa sa iyang mga kaatbang sa politika ang nagpasiugda niini apan maklaro diha sa konseho nga mayoriya sa mga sakop niini kaalyado ni Bise Mayor Abe Canoy nga maoy kanhi mayor sa lungsod kaniadto. (BANAT NEWS)