Kapitan sa Pasil gipangita kay tua sa US nanarbaho

CEBU - Nangita na ang pipila ka mga molupyo sa barangay Pasil ning siyudad sa Sugbu sa ilang barangay kapitan nga si Romeo Ocarol.

Kini tungod kay ang kapitan giingong wala na nila igkita sulod na sa pipila ka mga buwan diha sa ilang barangay.

Dunay mga taho nga nasagap sa Banat News nga si Ocarol milarga paingon sa Estados Unidos ug nanarbaho didto.   

Gikonpirmar sa barangay secretary sa Pasil nga si Gina Gonzales nga si Ocarol milarga sa Amerika niadtong ikaduhang semana sa buwan sa Agosto.

Apan gitataw ni Gonzales nga wala manarbaho ang ilang kapitan sa maong nasud kun dili kini giingong igo lang nagbakasyon.

Nagkanayon ang barangay secretary nga si Ocarol gipaabot nga mobalik dinhi sa Sugbu o sa ilang barangay karong sunod buwan.

“Nia na gyud to si kap sa sayong bahin sunod buwan kay tulo ka buwan ra man tong iyang leave,” sumala ni Gonzales.

Nasayran gikan sa Department of Interior and Local Government (DILG) nga gikinahanglang dili molapas sa tulo ka buwan ang foreign trip sa kapitan.

Kini tungod kay kun mosobra na sa tulo ka buwan, ang travel order giingong nanginahanglan na og pirma sa kalihim sa DILG.

Niingon si Noval nga ang travel order ni Ocarol gikinahanglan og pirma gikan sa local chief executive aron mamahimo kining awtorisado.

Gitataw hinuon sa barangay secretary nga si Gonzales nga ang biyahe sa ilang kapitan dunay pagtugot ni Mayor Tomas Osmeña.

Kasamtangang mihulip kang Ocarol isip officer in charge sa barangay mao ang ilang numero unong kagawad nga si Felipe Cabonelas. (BANAT NEWS)