Mag-amahan mipatay sa umagad

CEBU - Amahan ug anak nagtinabangay sa pagpusil sa ilang umagad nga dugay na nilang gikasungi hinungdan sa kamatayon niini didto sa barangay Cantubaon, lungsod sa Tabuelan niadtong Domingo sa alas 5:30 sa hapon.

Ang biktima nga naputos sa mga samad pinusilan ang lawas ug ulo niini   patay diha-diha daplin sa dalan mao si Danny Sida, nagpuyo sa nahisgutang lugar ug pagpanguling ang trabaho niini.

Samtang ang suspek mao ang amahan sa iyang asawa nga iya ra usab nga ugangan nga si Tomas Tantan, ug ang anak niini nga brother- in-law sa biktima nga si Lodevico Tantan, 39 anyos, minyo pulos molupyo sa maong lugar.

Matud ni SPO2 Christopher Sanchez imbestigador sa Tabuelan Police Station sa dihang nahinabi sa Banat News subay sa ilang inisyal nga imbestigasyon ang biktima nag-estorya kini daplin sa karsada ngadto sa iyang mga kaila sa dihang kalit nga miabot ang amahan ug anak nga suspek.

Ang suspek nga amahan nagkanayon pa kini nga “asa ang isog diri” dayon deretso og pusil sa biktima ug naigo sa walang bahin sa abaga ug misuway unta kini og dagan pahilayo.

Apan matud ni SPO2 Sanchez nakadagan pa unta ang biktima apan gitabangan kini og gukod sa amahan ug anak nga suspek samtang nagsigi og pusil ngadto sa biktima ug pag-abot sa 100 ka gatos metros ang gilay-on nalup-og ang biktima sa dalan tungod sa mga samad pinusilan niining naangkon.

Sa pagkatumba sa biktima gitiwasan pa gyud kini og pusil sa mga suspek hangtod nga namatay gamit ang mga armas sa duha ka suspek nga wala pa matino ang kalibre.

Ang biktima nakaangkon og daghang samad pinusilan sa iyang bukobuko, duha sa iyang tiyan, dughan ug ulo dapit sa iyang dunggan nga maoy hinungdan nga patay kini diha-diha ug wala na madala pa sa tambalanan.

Samtang ang mga suspek human sa hitabo boluntaryo usab dayong mitahan sa ilang kaugalingon ngadto ni Kapitan Renerio Oca ug gi-turn-over dayon sa kapolisan ug nagtingkagol na karon sa detention cell samtang nagpaabot sa kasong ipasaka batok nila.

Dugang nahipos nga impormasyon ni SPO2 Sanchez daan nang nagkasungi ang kabubut-on tali sa suspek ug sa biktima human nasuko ang umagad niini nga giguba ang balay nga gipuy-an sa biktima ug sa asawa niini nga si Dina Tantan Sida ug mibalhin sa pagpuyo diha sa barangay Cantubaon.

Matud pa ang umagad nga suspek maoy nagasto pagpagabas sa mga kahoy nga gibalay sa pamilya sa biktima apan nasuko kini kay gipaguba aron lang mobalhin sa pagpuyo.

Hinuon ang kapolisan sa Tabuelan padayon pang mipailawom sa ilang imbestigasyon pagtumbok sa lain pang motibo sa maong krimen.  (BANAT NEWS)