Manager sa gay bar sikop sa buy bust operation

CEBU - Arestado ang usa ka mahuyang nga manager sa usa ka gay bar sa dakbayan sa Lapulapu sa gihimong buybust operation sa mga sakop sa Philippine Drug Enforcement Agency-7 diha mismo sa iyang balay sa sitio Seaweeds sa barangay Pusok dakbayan sa Lapulapu niadtong Sabado sa hapon.

Ang gidakop giilang si Stalin Bataluna, 31, residente sa maong dapit human kini gikatahong nakuhaan og siyam ka paketeng may sulod nga gidudahang shabu, usa niini maoy subject sa buybust operation.

Si Jessie Tabanao, tigpamaba sa PDEA-7 mitug-an sa Banat News nga duna silay impormasyong gawas sa pagka-manager niini sa usa ka gay bar diha sa maong dakbayan siya ra usab ang ‘ekslusibong’ tig-suplay og shabu sa iyang mga dancers.

Matud pang Tabanao gawas pa niini mobaligya usab siya og shabu gawas sa iyang mga customer basta iyahang mga kaila ug diha ra kini mahitabo sa ilang balay, ug ning tungura usa ka lalaki ang mipalit kaniya uban ang mga sakop sa PDEA-7 hinungdan sa pagkadakop niini.

Apan si Bataluna nga nahinabi sa Banat News kusganong mihimakak nga tigbaligya siya og shabu diha sa iyang gidumalang bar ug ingon man sa ilang balay.

Dako ang iyang pagtuong panimawos ang nahitabo kaniya sa kanhi gay bar usab nga iyang gidumala kaniadto sulod sa unom ka tuig ug karon naa na siya sa kakumpetensyang gay bar nag-manage.

Sumala pa niya nga naguba ang maayong relasyon niya sa tag-iya sa kanhi gay bar nga gialagaran maong mibalhin siya ug nagduda siyang dunay nasilo niini tungod kay hasta ang mga kanhi parokyano sa maong gay bar lakip na mga langyaw mibalhin na didto sa iyang bag-ong gialagarang gay bar.

Gibutyag usab niya nga ang kaubang “asset” sa mga midakop kaniya ig-agaw sa tag-iya sa kanhi gay bar nga iyang gialagaran ug na-frame up siya sa maong hitabo. (BANAT NEWS)