CEBU - Pagpang-apod ni Gobernador Gwendolyn Garcia sa mga deed of sale sa mga lote diha sa barangay Lahug gihulagway ni Kapitan Mary Ann Delos Santos nga usa ka bayanihong buhat karung panahona alang sa mga kabus nga Sugbuanon.
Ang pamahayag ni Delos Santos giluwatan kagahapon diha sa Cebu International Convention Center (CICC) atol sa pagpanghatag sa maong mga dokumento ngadto sa mga residente sa siyam ka barangay dinhi sa dakbayan sa Sugbu ubos sa 93-1 ordinance.
Si Delos Santos kinsa maoy katapusang nihatag sa iyang speech midayeg sa gobernador tungod sa “political will” niini ug ang nabulahan ang mga kabus nga molupyo sa dakbayan nga wala mahimo sa mayor.
Gipalakbitan usab ni Delos Santos ang mga opisyales sa City Hall nga nagsige og panaway kang Garcia apan wala makahimo’g kaayohan sa mga eskwater sa kabarangayan ilabi na sa barangay Lahug.
Ang gobernador sa iyang bahin nagkanayon nga iya gyud nga gipaningkamotan nga mahatagan og deed of sale ang mga lumolupyo dinhi sa dakbayan sa Sugbu nga naapektahan sa kasungian sa Kapitolyo ug sa dakbayan sa mga luna niini. (BANAT NEWS)