Taga-Dakit papuy-on sa Condominium

Posibleng anha una sa Cebu City Condominium pabalhinon ang mga molupyo sa sitio Dakit, barangay Guadalupe nga gimanduang pabakwiton human sila nagdumili sa pagbalhin ngadto sa gihatag kanilang temporaryo nga kapuy-an sa sitio Mahayahay.

Gisugdan na unta pagmuntar ang mga tent diha sa sitio Mahayahay nga maoy himuong temporaryong kapasilungan nila dihang namahayag ang maong mga molupyo nga mas palabihon pa nila nga anha lang una matulog sa sports complex sa Guadalupe kay sa mamalhin sa temporaryong relocation site.

Ang kalayo sa lugar ug kalisod sa agianan pagdala sa mga butang nila maoy nag-unang rason nila sa pagdumili sa pagbalhin.

Dili usab sila gusto nga mobakwit sa dapit nga temporaryo lang papuy-an kanila sa kabalaka nga papahawaon lang usab sila dayon.

Tungod niini gitakda kagahapon ang pagtagbo sa mga sakop sa Cebu City Disaster Coordinating Council (CCDCC) uban kang acting Mayor Michael Rama.

Gipatambong usab ang representante sa Monterrazas de Cebu nga maoy nangita og dapit nga pabalhinan sa mga molupyo ug subling gituki ang kahimtang sa apektadong mga molupyo ug kung asa ang maayong dapit nga himoon niining relocation site.

Si Konsehal Gerardo Carillo kinsa sa samang higayon mao usab ang tsirman sa CCDCC gusto nga ang Monterrazas maoy moabaga sa binuwan unya nga bayranan  o  abangan sa ibalhin nga mga molupyo ngadto sa condominium.

Nasayran nga duna pay 24 ka lawak nga bakante ang condominium nga mahimong papuy-an sa mga molupyo kung mosugot ang Monterrazas sa proposal ni Carillo.

Labing minos 16 ka pamilya ang gimandoan ni Rama niadtong miaging semana nga pabalhinon tungod sa giingong kadelikado sa ilang nahimutangan ilabi na kun mobunok ang kusog nga uwan tungod kay ang gitukoran sa ilang mga balay agianan sa baha.

Apan sa bag-ong kalamboan sa balita sa TV Patrol Central Visayas kagahapon sa hapon gikauyunan sa kadagkuan sa dakbayan ingon man sa mga residente ug developer nga di na lang ihinayon ang pagpabalhin kanila.