Banilad flyover paagian motorsiklo

Paagian na sa mga motorista sugod karong Huwebes ang gitukod nga flyover diha sa barangay Banilad ning dakbayan sa Sugbu.

Kini maoy gibutyag ni Kongresista Raul del Mar human usab pahibaw-a sa kontraktor sa flyover nga nahuman na ang maong proyekto.

Taliwala sa maong kalambuan dili pa hinuon matino sa kongresista kun kanus-a mainugurahan ang bag-ong flyover.

Kini tungod kay giingong agdon nila ang schedule ni Presidente Gloria Macapagal Arroyo nga maoy pasubhon sa multi-million project.

Sa pagkakaron nagpadayon pa ang pagpanglimpyo sa mga trabahante alang sa gitakda nang pagbukas sa flyover.

Ang P89.6 milyones nga proyekto dunay 300 ka adlaw nga contract period ug gisugdan ang pagtrabaho niini niadtong Pebrero 1.

Apan ang kontraktor mipasalig nga ablihan na alang sa mga motorista ang flyover karong Huwebes sa dili pa ang Todos los Santos ug Adlaw sa mga Kalag.

Butang nga gihangop ni Konsehal Sylvan Jakosalem, ang chairman sa Committee on Transportation sa City Council.

Kini tungod kay napanglantawan nang daan sa konsehal ang panaghuot unya sa mga sakyanan diha sa Banilad atol sa kalag-kalag.

Ang project engineer sa WTG Construction and Development Corporation nga si Christopher Semilla mipahibalo hinuon nga dili pa mahuman ang ilang trabaho.

Kini tungod kay ila pang ipadayon ang pagpanindot sa duha ka dalan kilid sa flyover kun hingpit nang maagian ang overpass.

Ang flyover gituuhan sa mga opisyal sa dakbayan nga dako og ikatabang pagpaluag sa traffic congestion nga sagad masinati diha sa Banilad-Talamban area.