Motor gikarnap
CEBU - Naminghoy ang usa ka tawo human karnapa ang iyang motorsiklo ug gikawat pa gyud ang iyang personal computer sulod sa ilang balay sa F. Jaca St., barangay Inayawan ning dakbayan niadtong miaging gabii. Ang biktima giila sa kapolisan nga si Carmelito Jaca, 47, minyo nga taga F. Jaca St.
Ang biktima nga nagtibin nga misumbong sa kapolisan sa Pardo Police Station mitug-an nga balor og P30 mil pesos nahanaw niyang motorsiklo , samtang ang computer set nagkantidad usab og P26 mil.
Si PO3 Edmund Tiempo sa Pardo Police Station mibutyag sa Banat News nga nahinanok pag-ayo ang biktima sa pagkatulog sa ilang lawak dihang pagbangon niya sa pagkabuntag wala na sa parking area sulod sa ilang compound ang iyang motorsiklo, ingon man computer nga diha sulod sa ilang balay.
May pagtuo ang biktima nga ang mikarnap sa iyang motorsiklo mao ra usab ang mikawat sa iyang computer set.
Nagtuo usab ang biktima nga sa main gate ra nila moagi ang karnaper ug yano ra kaayo kining miabli sa ilang sliding door ug nakasulod sa ilang balay.
Hangtod karon padayon pang gipangita sa kapolisan ang karnaper ug kawatan. (BANAT NEWS)
- Latest
- Trending
