Liboan ka estudyante motungha sa MCC

CEBU - Liboan ka mga tinun-an ang gikatakdang motungha sa Mandaue City College (MCC) nga gidumala sa presidente nga si Dr. Paulus Marae Cañete nga nahimutang sa Eversely Child Sanitarium sa barangay Jagobiao, dakbayan sa Mandaue sa ikaduhang semester sa pagbukas sa klase karong tuiga.

Si Dr. Elmer Repalda nga maoy tigpamaba sa maong tulunghaan nga nahinabi sa Banat News kagahapon ang mipadayag niini.

Matud ni Dr. Repalda nga naglakip sa mga tinun-an nga nagpatala sa maong tulunghaan sa ikaduhang semester karong tuiga mao ang mga lumolupyo sa Consolacion, dakbayan sa Lapulapu, Lilaon ug silingang kalungsoran dinhi sa lalawigan.

Gipasabot ni Repalda nga sanglit ilang tinguha nga kahatagan og kahigayonan nga makatungha ang mga kabus nga tinun-an nga dili makasugakod sa pagbayad sa dakong kantidad nga entrance fee ang ilang gihimo mao ang pagpakunhod niini.

Gikan sa P500 nga entrance fee gihimo nalang kining P300 apan P100 gihapon ang unit sa matag subject nga kuhaon niini.

Dugang pa ni Dr. Repalda nga walay nakuha sa mga kurso nga ilang gitanyag sukad pa sa pagbukas sa maong tulunghaan hangtud niining panahona sanglit padayon man ang ilang pagtanyag niini.

Naglakip sa mga kurso nga ilang gitanyag mao ang nursing, engineering, criminology, Liberal Arts, computer literacy, Bachelor of Science in Elementary Education, (BSEED) Bachelor of Science in Secondary Education   ug uban pa.

Matud pa ni Repalda nga padayon karon nilang gipalambo ang ilang laboratory alang sa college of nursing, pagbutang og kaugalingong library ug lakip na ang pagpakiglambigit sa mga dagkong tambalanan dinhi sa Sugbu alang sa internship niini.

Si Repalda miingon nga si 6th District Representative Nerissa Soon-Ruiz maoy naggahin og dakong kantidad gikan sa gahin sa iyang buhatan alang sa padayon nga pagpalambo sa kahimtang sa maong tulunghaan.

Dugang pa niya nga mitanyag usab og tabang alang sa pagpalambo sa maong tulunghaan ang pipila ka mga opisyal sa kagamhanan sa lalawigan ug ingon man usab ang pipila ka mga opisyal sa nasudnong kagamhanan.  (BANAT NEWS)