CEBU - Nasikop sa kapolisan ang usa ka kapitan sa barangay nga giingong masiao coordinator didto sa lungsod sa Argao uban ang unom ka mga staff niini sulod sa usa ka carenderia sa merkado publiko sa lungsod nga gi-abangan niini ug gihimong headquarter sa ilegal nga sugal sa masiao atol nga nag-tally kini sa mga numero niadtong Sabado sa alas 10 sa gabii.
Ang nasikop atol sa gilusad nga pagpangronda sa mga sakop sa Police Intelligence Bureau sa Cebu Provincial Police Office (CPPO) pinangulohan ni Police Chief Inspector Ma. Elma delos Santos mao si Kapitan Pacita Villamora sa barangay Panadtaran sa bukirang bahin sa Argao samtang nag-tally og mga numero sa kombinasyon sa sugal nga masiao.
Apil sa mga nasikop sa akto mao ang mga staff niini sa maong ilegal nga sugal nga sila si Micheal Gegremosa, Markim Gegremosa, Isabelo Remorosa, Del Nino Bajenting, Helen Puerto ug Cipriana Tampoy mga molupyo sa barangay Panadtaran.
Ang mga sakop sa kapolisan mipahigayon og operasyon subay sa search warrant nga giluwatan ni Judge Geraldine Faith Econg sa Oslob RTC branch 22.
Lakip sa mga ebidensya nga narekober gikan sa ilang posisyon mao ang walo ka stub sa masiao nga dunay lain-laing kombinasyon sa numero, computer ug speed tipsheets, 59 ka tally sheets nga dunay kombinasyon sa mga numero, laing 20 ka central tallysheets ug duna pay blangko nga mga tallysheets, unom ka ballpen, usa ka stapler ug kwarta nga koleksyon sa pusta sa sugal nga masiao nga mokantidad og P5,263 gikan sa lain-laing kantidad nga papel ug mga sensilyo.
Si Markim nga nahinabi sa Banat News mitug-an nga ang iyang maguwang nga si Micheal maoy nag-abang sa maong stall sa merkado ug gihimo niya kini nga karenderiya apan ang kapitan maoy mogamit niini panahon sa gabii human sa ilang paninda ug sud-an.
Matud niya wala siya'y labot sa maong ilegal nga sugal sa masiao tungod kay igo lang siyang gisugo sa iyang igsuon nga paanhaon sa tindahan tungod kay dunay sud-an nga ipakuha apan natingala na lang siya tungod kay pag-abot niya sa tindahan kalit lang usab miabot ang mga polis nga mipahigayon og pagpangronda ug gihurot sila og dakop apil na ang ilang kapitan.
Ang mga dinakpan kasamtangang gibalhog karon sa detention cell sa CPPO samtang karong buntag ipasaka ang tukmang sumbong batok nila.
Hinuon ang kapitan nga si Villamora nagdumili hinuon pagpa-interview dihang gisuwayan kini og kuha sa iyang habig kagahapong adlawa ning tigbalita didto sa CPPO. (BANAT NEWS)