MCPO andam na sa 'Undas'

CEBU – Higpit nga bantayan sa kapolisan ang mga sam-ang sa dakbayan sa Mandaue atol sa Kalag-Kalag ug Todos Los Santos karong    Nobyembre 1 ug 2.

Sa pagkakaron gihan-ay nang daan ni Mandaue City Acting Director Superintendent Vicente Mersan Premne ang mga polis nga idestino sa pagbantay sa mga menteryohan sa dakbayan.

Si SPO1 Marcos Noval sa operation section sa MCPO mibutyag sa Banat News nga sugod pa sa bisperas o sa Oktobre 31, iplastar na nila ang mga kapolisan nga moguwardiya sa mga sam-ang.

Paabagan kini sila sa mga barangay tanod ug Barangay Intelligence Network (BIN) sa pagpatuman sa kahapsay ug kalinaw.

Ang mga menteryohan nga guwardiyahan sa mga otoridad mao ang sam-ang publiko   sa barangay Guizo ug ang Mandaue Park nga anaa usab sa tupad niini, Angelicum Cemetery sa barangay Canduman ug uban pa.

Si Noval miingon nga atol sa maong mga adlaw ilang higpit nga idili ang pagdala og ilimnong makahubog ug armas nga makamatay sulod sa menteryohan aron sa pagpabilin sa hingpit nga kalinaw sa maong mga adlaw. – BANAT NEWS