CEBU – Kritikal ang kahimtang sa 41-anyos nga lalaki human gitagod og tigbas og pinuti sa iyang silingan niadtong Biyernes sa gabii diha sa sitio Tagunol All Season, barangay Cogon-Pardo ning dakbayan sa Sugbu.
Ang biktima kinsa pabilin pang giatiman sa mga doktor sa Cebu City Medical Center (CCMC) giila sa kapulisan nga si Jonathan De Guzman nagpuyo sa nahisgutang lugar.
Samtang ang suspetsado mao ang iyang silingan nga ginganlan lang og “Eddie” hingkod ang panuigon kinsa padayon pang gipangita sa kapulisan.
Sa imbestigasyon nila ni SPO2 Rey Cuyos ang biktima gikatahong gikan kini sa inom uban sa iyang mga higala nga ginganlan lang sa “Titing” ug “Michael.”
Matud pa nga samtang ang biktima naglakaw sa dalan padulong na untang mopauli nga pwerteng huboga kalit lang nibutho ang suspetsado nga nagdala sa pinote.
Way daghang pangutana ug igong rason gitigbas niini ang biktima diha sa iyang walang liog, walang bahin sa lawas, paa, ingon man duha ka mga kamot niini.
Human sa pagpanigbas dali kaayong nakasibat ang suspetsado palayo sa ilang lugar samtang ang biktima gidali sa pagdala sa tambalanan. – BANAT NEWS