Tigum sa Basilica vendors ug SPEED na-emosyonal

CEBU - Nagsagol ang gibating emosyon sa mga sakop sa Santo Niño Sidewalk Vendors Association (SNSVA) diha sa dalan Jakosalem sa dihang gipatawag kagahapong adlawa ni acting Mayor Michael Rama uban sa hepe sa demolition team nga si Vicente Mercado.

Kini kabahin sa tinguha sa SNSVA nga mauli ang ilang baligyang gisakmit sa demolition team pipila ka buwan na ang nakalabay nga giingong hinay-hinay nga gipamaligya sa mga sakop sa demolition team.

Nangalipay ang mga manindahay sa dihang gimando ni Rama ngadto kang Mercado nga ipauli sa mga vendors ang nasakmit nga mga imahen.

Sa samang higayon naguol usab ang mga vendors tungod kay giingong gamay na lang ang nahabilin sa ilang mga imahen nga gipangsakmit.

Sa pagsuwat ning balita nagtigom pa ang mga manindahay uban sa ilang presidente nga si Basan Amora kung unsaon nila pagkuha ug pagbahin-bahin nalang sa nahabiling mga imahen.

“Amo pang gisabutan karon kung unsaon namo na kay ila man gud nga gisagol-sagol pagbutang ang tanang nasakmit nga mga imahen unya gamay na lang,” sumala ni Amora.

Una nang gibana-bana ni Amora nga mokabat na og P200 mil ang nasakmit nga mga imahen nga gibutang sa bodega sa demolition team. Apan atol sa pagduaw ni Amora ug kaubanan sa buhatan sa demolition team sa miaging mga adlaw giingong mokabat na lang og P20 mil.

Kusganon hinoong gipanghimakak ni Mercado ang pasangil sa mga vendors uban sa pagpakita og listahan sa mga butang nga ila nang na-release ngadto sa mga tag-iya. – BANAT NEWS