CEBU - Naangol ang 15-anyos nga bugtong anak lalaki ni Bokal Wilfredo Caminero human madisgrasya sa dihang nakaligis og iro ang gisakyan niining motorsiklo didto sa barangay Taloot, lungsod sa Argao paingon na untang mopauli gikan nga mitambong og drag racing sa barangay Guiwanon kagahapon sa alas 12:30 sa kaadlawon.
Ang 15-anyos nga anak sa board member nga tinun-an sa 3rd year high school sa maong lungsod nakaangkon og dakong samad sa nawong ingon man mga pangos sa bukton ug ubang bahin sa kalawasan dihang nalamba ang gisakyan niining motorsiklo sa sementado nga karsada.
Apil sa naangol ang ilang drayber nga maoy nagmaneho sa motorsiklo nga si Bryan Briones, hingkod ang panuigon ug molupyo sa maong lugar.
Gikonpirmar sa nurse on duty sa Isidro Kintanar Memorial Hospital nga nagdumili lang pagpaila sa iyang pangalan nga nadala sa tambalanan ang mga biktima alas 12:30 kagahapon sa kaadlawon apan ila dayon kining gi-refer sa tambalanan dinhi sa dakbayan sa Sugbo tungod sa daghang mga samad ug pangos nga naangkon niini.
Samtang gibutyag ni Caminero sa dihang nahinabi sa Banat News kagahapon sa buntag nga luwas na sa makuyaw nga kahimtang ang iyang anak apan nagpabilin pa kini sulod sa South General Hospital sa siyudad sa Naga.
Si Cameniro nanganti nga iyang ipa-imbestigar ang gipahigayong drag racing diha sa barangay Guiwanon ug Taloot nga maoy gikabuangan sa mga batan-on sa ilang lugar ug sikbit nga mga lungsod apil na sa iyang anak nga pagahimoon sa kawat kawat nga paagi panahon sa gabii.
Gitug-an sa board member nga mohapit usa ka tuig na ang drag racing nga gipahigayon sa maong lugar ug gikahibulong niya kun ngano nga walay aksyon nga gihimo batok niining maong ilegal nga kalihukan ang kapolisan sa ilang lungsod sa Argao.
Si Caminero nanganti nga moduso siya og resolusyon sa Hunta Probinsyal nga mag-awhag pag-imbestigar sa gipahigayong drag racing apil na ang paghimo og kasayuran kun ngano nga wala kini dakpa sa kapolisan.
Matud sa board member kagahapon sa buntag pa lang siya nasayod sa pagka aksidente sa iyang anak gikan siya nga mibiyahe sa lungsod sa Santander sa dihang gitawgan ug gipahibawo sa iyang asawa nga nalandig sa tambalanan ang kamanghuran niyang anak.
Samtang gibutyag ni SPO1 Arnold Abenir, imbistigador sa Argao Police Station sa dihang nahinabi sa Banat News nga nakadawat sila og report kabahin sa maong drag racing sa maong lugar apan wala sila mohimo og aksiyon niini tungod usab kay pulos lang estorya-estorya ang ilang nadawat ug wala gyuy pormal nga reklamo.
Dugang report nga nadawat sa kapolisan nga ang anak mismo sa board member nga na-aksidente ang nakadaog kini sa maong drag racing sa milabay’ng bulan ug gani gikataho nga nangreklamo pa ang pipila ka mga kontra niini tungod kay gipakusgan ang 100cc nga motor niini ug gihimong 135cc nga maoy hinungdan sa pagdaog.
Hinoon wala ma-blotter sa kapolisan sa Argao ang maong pagka-aksidente sa anak sa board member. – BANAT NEWS