Taga Dakit 'gipugos' papahawa

CEBU - Gisugdan na pagpatuman kagahapong adlawa sa kagamhanan sa dakbayan sa Sugbu ang pugsanong pagpabakwit sa mga molupyo sa sitio Dakit diha sa barangay Guadalupe.

Labing minos 16 ka pamilya diha sa nahisgutang lugar ang gipugos pagpahawa sa ilang tagsa-tagsa ka panimalay tungod sa peligro sa pagbaha gikan sa usa ka gi-develop nga lugar sa ibabaw'ng bahin sa ilang lugar.

Ang gipapahawa mao sila si Encarnacion Cueva, Jesusa Cueva, Alfredo Carlet, Virginia Garlet, Adelsida Libradilla, Jeffrey Magsayo, Maria Magsayo, Corazon Mulles, Susana Magsayo, Avelina Montano, Donna Torrecamo, Carmelita Sabay, Janice Loquinario, Maria Theresa Montano, Evelyn Montano ug Marilyn Cuevas.

Ang kamanduan giluwatan ni acting mayor Michael Rama human usab mogawas nga agianan gyud og tubig ang dapit.

Katapusang nasinati sa mga residente sa sitio Dakit ang pagbaha dihang nibunok ang kusog nga uwan dinhi sa siyudad sa nakalabay nga mga semana.

Temporaryong gipabalhinan sa apektadong mga molupyo mao ang luna nga gipanag-iya sa Monterrazas de Cebu sa sitio Banawa diha sa nahisgutang barangay.

Matud ni Konsehal Gerardo Carillo nga abagahon sa siyudad ang pagkaon ug ubang panginahanglan sa mga naapektahan.

Ang konsehal nga maoy chairman sa Cebu City Disaster Coordinating Council (CCDCC) miingon hinoon nga kini sulod lang sa usa ka semana.

Duna say gipadalang 20 ka mga tents nga gihimong temporaryong puy-anan sa mga molupyo ug hingpit gub-on ang ilang mga balay kung naa nay relocation site.

Mipahibalo si Carillo nga posibleng madugangan pa ang mga molupyong pugson sa pagpabakwit depende lang unya sa rekomendasyon sa Office of the Building Official (OBO) samtang gituki pa gihapon sa dakbayan ug sa developer sa Monterrazas ang permanente nang relocation site sa apektadong mga molupyo. – BANAT NEWS