CEBU - Gimanduan na sa Cebu City Schools Division ang district supervisor sa Emilio Osmeña Integrated School pag-imbistigar sa principal ug mga magtutudlo sa nahisgutang tunghaan.
Matud sa Officer In Charge sa Cebu City Schools Division nga si Wilfredo Tano, ila nang gipadad-an og suwat si Febelyn Bendulo kagahapong adlawa.
Kini alang sa pagpahigayon og pormal nga imbestigasyon labot sa pasangil sa mga ginikanan sa mga tinun-an sa maong tunghaan ug mga opisyal sa barangay Bout-Taup.
Gisumbong nila ngadto kang City Hall Education Consultant Joy Augustus Young nga sayong mamauli matag Biyernes ug dugay usab motunga sa adlaw'ng Lunes ang mga magtutudlo.
Sa kalagot ni Young gusto niini nga suspensuhon kun dili man taktakon sa katungdanan ang principal nga si Floreiphine Navarro ug ang mga magtutudlo sa maong tunghaan.
Kini tungod kay alang kang Young, dili angayang himoong panag-ingnan ang nahisgutang mga magtutudlo sa ilang mga kaubang magtutudlo.
Apan matud ni Tano nga ila unang hatagan og due process ang mga hingtungdan aron makatubag sa pasangil hinungdan nga kini iyang gipaimbistigahan.
“Among gipaim-bestigahan sa district supervisor ning maong report kung unsa ka tinood ug ipasubmitir diri sa maong office ang resulta sa investigation,” sumala ni Tano.
Niingon si Tano nga tulo ka adlaw lang ang iyang gihatag nga tagal kang Bendulo pagpahigayon og imbestigasyon ug pagsumitir og report sa iyang buhatan.
Nagkanayon si Tano nga kung mapamatud-ang nakahimo og kalapasan ang prinsipal ug mga magtutudlo kini sigurado nga mapahamtangan og silot. – BANAT NEWS