CEBU - Naminghoy ang abaga sa usa ka ginang nga tag-iya’g boutique human gilabni sa usa ka snatcher ang iyang bag nga may P139 mil kagahapon sa alas 10:00 sa buntag diha sa may Mabini St., barangay Sto. Niño ning dakbayan.
Nagpakitabang sa Waterfront Police Station si Aragerma Bordin, 36, taga Winfield Subdivision lungsod sa Consolacion kinsa gisakdapan sa usa ka esnatser.
Matud pa ni SPO3 Ernesto Caballero sa Waterfront Police Station nga gikahinabi sa Banat News gikan pa kini sa Consolacion sakay og taxi paingon unta diha sa may Patria de Cebu aron motambong og seminar. Apan sa pagkanaog niya sa taxi usa ka naghukas nga batan-ong nagpurol kalit nga milabni sa iyang bag nga maoy gisudlan sa maong salapi ug cellphone nga nagkantidad og P12 mil. – BANAT NEWS