PASG-7 direktor girelibuhan

CEBU - Director sa Presidential Anti-Smuggling Group kon PASG-7 pormal na gihulipan sa katungdanan sugod kagahapong adlawa.

 Kini gikumpirmar ni Supt. Ariel Palcuto sa Banat News atol sa pakighinabi niini kagahapon sa buntag ug miangkong nakugang siya sa maong fax message nga iyang nadawat gikan sa buhatan ni PASG Secretary Antonio Villar nga naglatid sa pag-terminate na sa iyang katungdanan isip Director sa PASG dinhi sa rehiyon 7.

 Sa maong kamanduan hulipan siya ni Major Paulo Perez, usa ka sakop sa Philippine Army.

 Gikwestyon ni Palcuto ang maong kamanduan gumikan kay wala siya'y nakitang basehanan sa maong mando ngano siya hulipan sa maong posisyon.

 Subay niini nasagmuyo si Palcuto gumikan sa iyang gipakitang paningkamot nga mawagtang ang bisan unsang matang sa smuggling dinhi sa Sugbu apan maoy iyang naani ang pagbaliwala sa ilang buhatan sa ilang mga kahago uban sa iyang mga operatiba nga misanong sa mga operasyon.

 Gipanghimakak usab ni Palcuto nga ang relieved order adunay kalambigitan sa ilang diriyot nga panag-engkwentro sa mga sakop sa NBI-7 gumikan kay usa lamang kadto ka miscommunications dihang ila unta kining sikupon.

 Gumikan niini iyang susihon ngadto sa ilang ulohang buhatan sa PASG kung unsay basehanan niini sa pagpahulip kaniya diin wala usab kini nalatid kung hain kini idestino base sa maong relieve order.

 Kahinumduman nga daghan nang kontrabando ang nasakmit sa PASG-7 ug ang labing kontrobersiyal mao ang pagkadiskobre sa mga luhong sakyanan nga gipalusot dinhi sa Sugbu diin ang uban niini gidudahang mga gipalusot usab ang rehistro niini sa buhatan sa LTO. – BANAT NEWS