CEBU - LalakI ug babaye nasikop sa mga tanod human kini masakping naghilawas kagahapon sa udto diha sa compound sa simbahan sa barangay Poblacion, dakbayan sa Talisay.
Ang duha posibleng pasakaan og kaso ngadto sa korte sa mga opisyal sa nahisgutang barangay.
Si Konsehal Gabriel Bonjoc sa barangay Poblacion kinsa tsirman sa komitiba sa kahapsay ug kalinaw nagkanayon nga nagka-istorya na sila ni Kapitan Teodoro Belleza ug ilang gikasabutan nga ang duha ang pasakaan og kaso nga “grave scandal”.
Ang mga giingong naghilawas diha sa publiko mao sila si Cornelio Samson, 42-anyos ug iyang 38-anyos nga kapuyo (ngalan gipugngan).
Si Samson ug ang iyang kapuyo nasakpan sa mga estambay ug mga estudyante nga milabay sa lugar nga nagtabon og habol samtang naghilawas.
Matud ni Bonjoc nga nakadawat sila og mga taho gikan sa mga nakasaksi kabahin sa maong insidente hinungdan nga sila si Rodulfo Mabala ug Ricardo Quijano, mga tanod sa barangay ang ilang gipasusi diha sa duol sa simbahan ug nasakpan sila si Samson.
Ang duha diha nagpahigayon sa ilang gibuhat sa “mini forest” duol sa simbahan ug nasakpang parehong walay salimbong sa lawas.
Si Bonjoc nagkanayon nga si Samson ug ang kapuyo niini parehong mga hubog.
Ang duha kinsa parehong mga residente sa lugar temporaryo karong nadetiner sa Talisay City detention cell.
Si Bonjoc midugang nga ang maong insidente ipaabot usab nila ngadto kang Msgr. Joselito Tajanlangit alang sa posibleng aksiyon niini tungod kay ang insidente nahitabo diha sa tugkaran sa simbahan. – BANAT NEWS