20-anyos gipusil sa papa sa iyang uyab

CEBU - Giandam na sa kapolisan sa dakbayan sa Sugbu ang kasong frustrated homicide batok sa usa ka taxi driver ug kauban niini nga mipusil sa hinigugma sa minor de edad niyang   anak niadtong Martes sa alas 8:30 sa gabii didto sa Sitio Tigbao, barangay Talamban, ning dakbayan sa Sugbu.

Ang nagtago-tago na karong mga panahona mao si Samuel Villahermosa, 47, residente sa Sitio Baka, barangay Banilad ning dakbayan samtang ang kaubanan niining ginganlan lang og “Lando”.

Si Villahermosa ug Lando maoy gitumbok nga responsable sa pagpusil sa biktimang si Kyle Limotan, 20, nagpuyo sa nahisgutang lugar kinsa nakaangkon og samad pinusilan sa iyang walang bahin sa lawas ug bukobuko gikan sa .45 armas.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office gikatahong ang biktima gipahibalo sa iyang higala nga adunay mga tawo nga nangita kaniya. Dihang gisusi niini iyang gikasugat ang suspek nga amahan sa iyang hinigugma nga 16 anyos nga si Cherry ug nangutana kun asa na ang iyang anak.

Apan ang biktima mitubag kini nga basin og tua sa panimalay sa iyang apohan nga babaye human usab kini naghisgot sa dihang nagkabuwag sila gikan sa ilang pagpanglakaw.

Diha-diha gipusil siya sa amahan sa iyang hinigugma ug naigo ang iyang tuong bahin sa lawas, apan nakahimo pa siya sa pagdagan apan gipusil usab sa kauban sa suspetsado nga si Lando ug naigo ang iyang buko-buko.

Human sa pagpamusil daling misibat ang mga suspetsado palayo sa dapit samtang ang biktima gidali sa pagdala sa usa sa mga pribadong tambalanan ning dakbayan ug karon gibalhin na sa Cebu City Medical Center.

Si Cherry nga nahinabi sa mga tigbalita mipadayag mga alas 7 niadtong miaging gabii didto siya sa balay sa iyang uyab   natulog gumikan usab sa kalapoy gikan nangaligo'g dagat sa dakbayan sa Lapulapu.

Matud pa niini nga naglibog pa siya hangtud ning mga higayuna ug iya pang hangyu-on ang iyang uyab nga dili mopasaka'g kaso batok sa iyang amahan, kini tungod kay maluoy usab siya sa iyang amahan. – BANAT NEWS