Kulto Mipatay Sa Magtiayon

CEBU - Gituohan sa kapolisan nga sakop sa kulto ang grupo nga mipusil-patay sa magtiayong mag-uuma didto sa lungod sa Alcoy niadtong Oktubre 9.

Ang officer-in-charge sa kapolisan sa Alcoy nga si SPO1 Primitibo Carungay nga nahinabi sa Banat News nagkanayon nga ang mga suspetsado nga sila si Estelito Alabat “Alyas Abat,” 20, ug Portamio Coronel, 18, mitahan sa ilang kaugalingon ngadto sa ilang uyoan nga nailhang si Jun Amaca nga nagsilbeng asset sa Regional Intelligence Office sa Regional Police Office (PRO-7).

Si Alabat nakahukom nga motahan human sa pipila ka adlaw nga pagtagotago. Pasakaan kini og kasong double murder tungod sa pagpatay sa magtiayong Epifanio Madaiton, 40, ug Jocelyn, 37 nga taga Nug-as, Alcoy. Ang magtiayon gikan sa barangay assembly sa dihang gibanhigan ni Alyas Abat ug Coronel.

Silang Alyas Abat ug si Coronel mitug-an kaniya nga duna silay grupo nga yamyaman nga dili madutlan og mga bala sa armas ang lawas.

Nagkugos pa sa 5-anyos niyang anak si Epifanio sa dihang gipusil sa duha, samtang gigukod si Jocelyn sa dihang midagan kini. Ang 12-anyos nilang anak nakadagan sa hitabo.

Si SPO1 Carungay mipadayag nga mga sumosunod sila sa usa ka tawo nga giisip nilang founder gikan sa dakbayan sa Bogo.

Matud pa ni Alyas Abat nga aduna silay dili mominos kapin sa napulo ka sakop diin ang matag usa adunay hulagway sa ilang “ginoo” sa duha ka mga braso, buko-buko ug dughan.

“Lahi ni ilang ginoo nga gipatik sa ilang duha ka mga bukton ug buko-buko bati man og mga nawong,” sumala pa ni SPO1 Carungay.

Apan bisan sa ilang pagsukit-sukit wala gyud kini motug-an kun unsay pangalan sa ilang grupo ug igo lang mipahibalo nga usa ka “Toning” nga taga dakbayan sa Bogo ang ilang lider.

Nunot niini, mihimo pa sila og background check sa maong mga suspetsado ug sa tibuok grupo niini sa ingon masuta kun wala ba kini koneksyon sa krimen.

Samtang kagahapon sa hapon, si SPO1 Eliezer Plando nga nahinabi sa Banat News mipadayag nga ang mga hulagway sa “ginoo” nga gipatik niini adunay mga numero nga gipatik.

Sumala pa niini ang duha mitug-an nga ang ilang grupo gitawag og “tambal ug barang” nga dili madutlan sa bisan unsang mga pagdaot.

“De numero man ning mga nakapatik sa ilang lawas nga naglibot sa gipatik nga ginoo sa ilang lawas dili man masabtan para tambal sa barang daw ni,” matud pa ni SPO1 Plando. – BANAT NEWS