PNP andam na sa Kalag-kalag

CEBU - Giandam na sa kapulisan sa dakbayan sa Sugbu ang implementing plan sa ilang pagpatuman sa seguridad sa pagsaulog sa “Kalag Kalag” karong sunod semana.

Kini maoy gipahibalo ni Sr. Supt. Patrocinio Comendador, hepe sa kapulisan sa dakbayan sa Sugbu nga karong Martes sunod semana ilang i-finalized ang security arrangement sa Kalag Kalag.

Sumala pa niini nga makig-alayon usab sila sa kagamhanan sa dakbayan sa Sugbu kinsa aduna usay mga programang gipatuman atol sa maong mga adlaw kini tungod kay gipa-aktibo niini ang mga barangay pinaagi sa pag-abag sa mga barangay tanod.

Samtang ila usab nga palig-unon ang pagpahigayon og pagpatrolya sa kadalanan aron masigurong dili malutsan sa mga kriminal, lakip sa ilang palig-unon ang presensya sa kapulisan kadtong mga barangay nga adunay mga dagko ug daghang mga sam-ang.

Ang Mabolo Police Station 4 dugangan og pwersa kini tungod usab sa kadaghang mga sementeryo sa ginsakupan niini.

Samtang subay niini iyang giawhag ang publiko nga likayan ang pagdala’g ilimnong makahubog, ingon man pag-inom-inom sulod sa mga sam-ang, mahait nga hinagiban aron dili makunpiskar.

Samtang ang kapulisan sa lalawigan sa Sugbu ni-activate na usab sa ilang “Oplan Kalag Kalag,” mopahugot usab sila sa seguridad sa mga sam-ang katoliko.

May mga K-9 dogs nga ilang ipakatap sa mga nag-unang pantalan sa probinsya ingon man sa South Bus Terminal, ang mga sakop sa Special Reactions Units (SRU) nga nadestino sa mga lungsod nga tensyonado ang politika sama sa Tudela ug Daanbantayan magpadayon kini. – BANAT NEWS