House rules sa Talisay usbon?

CEBU - Mibahad si Vice Mayor Lani Abarquez sa Talisay City nga usbon ang house rules sa konseho gumikan sa kapakyas ni Konsehal Shirley Belleza sa paggama sa gitawag nga “order of business”(OB) nga nahimong hinungdan sa kapakyas pagpahigayon nila og sesyon niadtong Martes.

Matud pa ni Abarquez nga ang katarungan sa mga konsehal nganong wala sila magsesyon tungod kay matud pa wala sila’y hisgutanang mga butang gumikan kay walay OB.

Ang OB maoy mga butang tukionon ug hisgutanan sa panahon nga magsesyon ang mga magbabalaod nga andamon 24 oras sa dili pa ang sesyon.

Ang sesyon sa konseho sa Talisay ipahigayon kini matag adlaw nga Martes .

Apan giingon nga si Belleza   may gitambungan nga dakong panagtagbo sa turismo sa Shangrila Mactan hinungdan ug mao malagmit ang hinungdan sa kapakyas niya pagpadala og OB ngadto sa mga magbabalaod.

Gumikan niini miingon si Abarquez nga unta kun may deperensya ang computer ni Belleza nga maoy nahimong hinungdan sa kapakyas niya pagpadala og OB ngadto sa mga konsehal, iya nalang untang gipadad-an sila og hard copy.

Matud pa ni Abarquez nga may gisugyot unta kaniadto ang kalihim sa Sangguniang Panglungsod nga siya’y moggama og OB ug calendar of business apan ang mayoriya sa konseho mao gyu’y nangusog nga ang majority floor leader gyud o si Belleza maoy pagam-on og OB basi sa ilang house rules.

Ang OB ipaagi na sa mga email address sa mga sakop sa konseho tungod kay “paper less” na sila karon ug lap tap na ang ilang gigamit.

Matud pa ni Abarquez nga kadaghan na kini mahitabo diin wala gyuy sesyon nga mahimo kung walay OB kay wala may ma-deliberate ang presiding officer ug mga konsehal sa ilang sesyon

Si Belleza gisuwayan og tawag sa Banat News apan wala gyud makontak ang cellphone niini.

Busa mibahad si Abarquez nga kun mao kini magpirme, iyang isugyot nga usbon ang ilang house rules. – BANAT NEWS