15 ka red plates ang nasakpan sa Ombudsman
CEBU - Sobra na sa kapin napulo ka mga sakyanan sa gobiyerno ang nasakpan sa mga sakop sa Task Force Oplan Red Plate sa nagpadayon nilang operasyon human gilusad sa miaging semana, maoy tahasan sa pagpanakop niadtong mga opisyal sa gobiyerno nga magdala og sakyanan ilabi na panahon sa Sabado ug Domingo.
Si Deputy Ombudsman for the Visayas Pelagio Apostol mibutyag atol sa interview sa usa sa mga sibyaanan dinhi sa Sugbu kagahapon nagkanayon nga ila nang gipanghatagan sa ilang hotline number ang tanang mga security guards sa mga department stores aron maoy mangunay og sumbong.
Matud ni Apostol nga sa pagkakaron ilaha nang gipaadto sa ilang mga imbestigador ang hingtungdan ahensya diin ang maong sakyanan anaa nakaisyu aron pagkuha sa supporting documents pagmatuod ug pagsuta kun legal ba ang paggamit sa sakyanan panahon sa Sabado ug Domingo.
Niingon si Apostol niadtong mga opisyal nga mapamatud-an nga sad-an nga iligal ang ilang paggamit sa sakyanan atol sa weekend sa maong mga sakyanan posibling mag-atubang og silot nga masuspenso gikan sa unom ka bulan ug posible na ngadto sa pagkataktak sa serbisyo depende sa gibug-aton sa ilang salaod.
Matud ni Apostol ilang tan-awon base sa ilang pakisusi kung wala bay mga pagpangilad sa ilang trip ticket.
Nagkanayon si Apostol ang ilang buhatan nanghatag og number sa mga gwardya ug ngadto sa media aron mahibaw-an sa publiko ang ilang numero.
Gisalikway ni Apostol ang pasangil ni Reynaldo Almadin, Bureau of Immigration (BI-7) Alien controller officer kansang sakyanan nasakpan sa Task Force Red Plate niadtong Domingo nga giparking sa mall nga usa ka demolition job ang pagkadakop sa iyang sakyanan.
Apan matud ni Apostol ang ilang buhatan wala nagpagamit ni bisan kinsa ug seryoso sila sa ilang kampanya.
Gani suma pa ni Apostol iya usab tan-awon ang mga dokumento ug trip ticket nga isumiter sa ilang buhatan ni Provincial board member Wilfredo Caminero kinsa nasakpan usab sa Task Force Red Plate niadtong Domingo nga giparking diha sa SM City sa may reclamation area ning dakbayan sa Sugbu. – BANAT NEWS
- Latest
- Trending
