Way kemikal nga nadala sa patay

CEBU - Gipasalig sa mga forensic experts nga tua na karon sa Sibuyan Island sa Romblon nga walay madalang patay’ng lawas dinhi sa Sugbu nga kontaminado sa makadaut nga kemikal.

Kini maoy gipahibawo ni Cebu City Acting Mayor Michael Rama human usab makadawat og text message gikan sa labaw sa NBI-DVI nga si Doctor Renato Bautista.

Ang mga forensic experts tua karon sa Romblon aron pag-obserbar sa pagsugod na og habwa sa mga patay’ng lawas gikan sa M/V Princess of the Stars.

Gatusan pa ka mga biktima ang gituuhan nga nangatanggong sulod sa nalunod nga barko atol sa pagtikyaob niini niadtong miaging buwan sa Hunyo.

Matud ni Rama nga gipaniguro ni Bautista nga ang madala nga mga patay’ng lawas dinhi sa dakbayan luwas gikan sa toxic chemicals.

“They’ll see to it that they will give clearance to bodies to be shifted to Cebu that they are uncontaminated by any toxic materials,” sumala ni Rama.

Gipaabot nga niining semanaha kasugdan na paghabwa sa salvage company ang mga patay’ng lawas sa mga biktima gikan sa nalunod nga barko.

Subay niini, gipahimangnoan karon ni Rama ang mga pamilya ug kabanay sa mga biktima nga magpaabot lang sa ila unyang pahibalo.

Dili gusto ang acting mayor nga manganhi sa Sugbu ang mga tagtungod sa higayon nga dalhon na dinhi sa dakbayan ang mga patay’ng lawas.

Gipasabot ni Rama nga wala nay mapaabot ang mga tagtungod tungod sa iyang pagtoo nga mga bukog na lang unya sa mga biktima ang madala dinhi sa siyudad.

“They should not be coming in if they are not called upon because there’s not much to be expected yet,” dugang pamahayag sa acting mayor.

Apan gipasalig ni Rama nga kung mahuman na ang proseso nga ipahigayon ug maila na ang mga biktima, ila gilayong pahibaw-on ang mga tagtungod niini.