Papa giluba sa anak

CEBU - Usa ka anak kinsa miunay pagdunggab sa iyang amahan didto sa Poblacion Ward-3 sa lungsod sa Minglanilla niadtong Domingo sa alas 7:00 sa gabii padayon pang gipangita hangtod karon sa kapolisan.

Ang biktima mao si Jaime Geonson, 54, usa ka biyudo, nga taga Poblacion Ward-3, samtang ang suspek mao ra usab ang kaugalingon niining anak nga si Gerome Geonson, 33 , ulitawo nga nagpuyo ipon sa biktima.

Si PO2 Edsel Recablanca sa Minglanilla Police Station mibutyag sa Banat News nga sa wala pa mahitabo ang pagpanunggab, ang suspek kinsa hubog sa alak kalit lang miabot sa ilang balay ug nangukay sa ilang mga butang.

Gibadlong kini sa biktima apan inay mopatuo, nasuko na hinuon ug dayong kuha og botelya sa softdrink nga bakante, unya gibuak ug maoy giduslak ngadto sa iyang amahan.

Ang biktima kinsa gilupig sa kusog sa suspek wala kapanagang hinungdang nasabak gyud makaduha ka higayon ang liog sa hait kaayong buak nga botelya.

Unya pagtan-aw sa suspek nga mibuhagay ang daghang dugo sa liog sa iyang amahan, misirit dayon kini pahilayo sa ilang balay.

Samtang ang samaron niyang amahan mao nalay miadto sa Minglanilla District Hospital aron sa pagpatambal sa iyang mga samad.

Hangtod karon wala pa igdungog kun hain mokagiw ang suspek ug mao kini ang gipangita sa mga kapolisan sa Minglanilla aron moatubang sa hukmanan ang sumbong nga gisang-at sa iyang amahan batok kaniya. – BANAT NEWS