Naghikog kay nagselos sa kapuyo

CEBU - Naghikog pinaagi sa pagbuslot sa kaugalingon niyang bagol-bagol ang usa ka 37 anyos nga lalaki human magduda nga dunay kabit nga lalaki ang 19 anyos niyang kapuyo didto sa Sitio Catugasan barangay Perrelos siyudad sa Carcar niadtong Lunes sa alas 5:30 sa hapon.

Ang namatay diha-diha human magpusil sa iyang kaugalingong ulo ginamit ang kalibre .357 nga armas de fuego mao si Rolando Nacar, 37, ulitawo, usa ka helper sa shop diha Perrelos.

Samtang ang iyang kapuyo giila usab nga si Hershey May Canales, 19 .

Si SPO1 Joel Pagdanganan sa Carcar City Police Station mibutyag sa Banat News nga sayo niadtong Lunes sa buntag nabati sa mga ginikanan ni Nacar ang buto sa armas gikan sa kwarto niini.

Dihang ila kining gisusi, maoy ilang nakita ang ilang anak nga nagbuy-od nga nagkadugo samtang diha sa iyang tupad ang .357 nga armas nga maoy gituohan nilang gigamit sa ilang anak sa pagpakamatay niini.

Matud pa sa mga ginikanan nga nahitabo ang paghikog sa ilang anak pipila ka gutlo human mobangon ug mogawas si Canales gikan sa ilang lawak nga mao pay pagmata.

Gibutyag sa mga ginikanan ni Nacar ngadto sa kapulisan nga nagduda sila nga nagselos ang ilang anak sa gikapuyo niini gumikan sa mga tabi-tabi nga may kabit ang naulahi.

Ang kapulisan naka-recover og usa ka kabhang sa bala sa .357 ug padayon pa nga gi-imbistigar ang maong hitabo aron sa pagtugkad sa posibling dugang pang hinungdan sa paghikog ni Nacar.

Hinuon matud ni SPO1 Pagdanganan nga wala pa nila kakuhai og pamahayag si Canales, ang kapuyo ni Nacar kay anaa pa kini sa hilabihang pagbangotan. – BANAT NEWS