CEBU - Usa ka 78-anyos nga lolo ang gidakop sa kapolisan human masakping nagdala og tulo ka pistolang walay mga papeles niadtong Domingo alas 8:30 sa gabii diha sa Pier I Legaspi Extension barangay San Roque ning dakbayan.
Ang akusado kinsa gipasakaan sa kasong kalapasan sa RA. 8294 kon paghupot og armas nga way lisensya giila nga si Genaro Cortes Ibale taga barangay Sentinela, Ubay Bohol.
Si Ibale nakuhaan og tulo ka mga armas, duha ka Colt .45 pistola ug usa ka .45 Llama Pistol uban sa pito ka mga buhing bala.
Usa ka impormante gikan sa probinsya sa Bohol ang nipahibalong dunay tiguwang lalaki nga mopauli paingon sa Bohol inig ka alas 10:00 sa gabii sa maong adlaw nga nagdala’g armas.
Si SPO1 Manuel Margallo sa Waterfront Police Station nga gikahinabi sa Banat News nitug-an nga ang ilang mga kaubanan nga sila si SPO2 Roel Hortelano maoy daling miatang sa pantalan ug midakop sa suspek.
“Kun ikaw magtan-aw dili ka katoo nga ang usa ka 78-anyos nga lolo magdala’g armas hinungdan nga kun dili mabantayan makalusot gyud kun magdalag mga armas,” sumala pa ni SPO1 Margallo.
Nakuhang impormasyon sa kapulisan gikatahong gikan sa Bohol ang mga armas ug gidala sa Danao ug gipaayo. – BANAT NEWS