Kilat mipatay'g anak angol

CEBU - Patay ang usa ka mag-uuma ug naangol ang anak niini human maigo sa kilat samtang namanday sulod sa ilang balay sa bukirang bahin sa barangay Tupas lungsod sa Pinamungajan niadtong Domingo sa alas 3:00 sa hapon.

Apan gipa-blotter ang maong panghitabo niana nang pagka Lunes sa alas 7:45 sa buntag.

Ang namatay mao si Herman Hernani Sr., 50, samtang ang anak niining naangol mao si Herman Jr, pulos molupyo sa nahisgutang lugar.

Matud ni PO3 Peter Cuanso sa Pinamungajan Police dihang nahinabi sa Banat News may gipanday ang duha sulod sa ilang balay samtang kusog kaayo ang bunok sa ulan diha sa gawas dungan ang pagdalugdog ug kilat niadtong higayuna.

Apan dihang nipaka ang kusog nga liti maayong pagkaigo sa balay sa pamilyang Hernani ug nasentro sa pag-igo si Herman Sr. ug maayong pagkasunog sa dughan niini samtang naputos sa mga paso paso ang kalawasan sa anak niini.

Daling gitabang sa mga silingan ang biktima apan patay diha diha si Hernani Sr. ug bugtong ang anak lang niini ang nadala diretso sa tambalanan dinhi sa dakbayan sa Sugbu tungod sa daghang paso niini sa kalawasan.

“Nilagom man kuno to ang dughan adto sir unya mga paso paso sa lawas raman sa anak”, dugang asoy ni PO3 Cuanso.

Ang barangay Tupas nahimutang kini sobra sa 10 kilometros sa bukirang bahin sa Pinamungajan sikbit sa barangay nga boundary sa siyudad sa Carcar. – BANAT NEWS