CEBU - Gipakagamay lang ug wala hatagi og importansiya ni acting Mayor Michael Rama ang kalihukan sa Task Force Red Plate sa Cebu human masigpati sa maong task force ang pipila ka sakyanan sa kagamhanan nga naka-parking ug nakit-ang mibiyahe sa miaging Sabado.
Matud sa acting mayor nga wala magkulang sa paghatag og pasidaan sa mga opisyal ug mga empleyado nga gisangonan og sakyanan sa kagamhanan.
Apan gitataw ni Rama nga dili malikayan nga dunay mga sakyanan sa siyudad nga magdagan bisan unsang adlaw sa semana.
“Naa man guy problema sab ana, tingale unya og sa sobra natong ka-estrikto nga dili na nato makab-ot ang atong tumong mahimo na hinuong kataw-anan.
Gikatakdang mobisita sa Cebu City Hall ang task force aron pangayoan og pasabot nganong nagdagan ang maong mga sakyanan bisan dili adlaw tingtrabaho o kumpleto ba kini og dokumento sama sa trip ticket.
Ang Ombudsman dugay nang mihingusog sa kampanya. Dili pa dugay nga si Pres. Gloria Macapagal-Arroyo miisyu og administrative order batok sa dili opisyal nga biyahe sa mga sakyanan.
Si Rama miingon nga si Mayor Tomas Osmeña adunay memorandum mahitungod niini. (BANAT NEWS)