CEBU - Hugtanong gipanghimakak ni barangay Kapitan Damaso Tumulak sa barangay Labogon, dakbayan sa Mandaue ang pasangil nga naghitak kuno ang ilegal nga sugal sama sa video karera, masiao, tigbakay ug uban pa sa iyang barangay.
Miingon si Tumulak nga walay kamatuoran ang maong mga pasangil nga gipadangat pinaagi sa Banat News apan iyang giangkon nga baraha ray nahimong kalingawan sa iyang mga molupyo sa Labogon karong panahona.
Giisip ni Tumulak nga usa lang ka pagpangdaot sa iyang katungdanan ang maong pasangil sanglit kining tanan walay basihanan.
Midugang si Tumulak nga kaniadto hinuon sa milabay’ng mga administrasyon grabe gyud hinuon ang nagkalainlaing ilegal nga sugal sa Labogon.
Apan dihang siya nay kapitan, iyang gipangronda ang tanan lakip na ang tigpayuhot og ilegal nga drugas ug gipangsikop hinungdan nga daghan ang nabalhog sa prisohan, samtang ang uban nag-atubang usab og mga kaso sa hukmanan.
Giangkon ni Tumulak nga sa mga dapit nga eskuwater ug daghang pobre dili kalikayan ang mga bisyong illegal kay mao lamang ang kalingawan sa ilang kinabuhi.
Midugang siya nga kining maong suliran nasinatian usab hapit sa tanang lugar sa nasud.
Apan depende lamang kana sa usa ka lider sa usa ka barangay diin kun sama kaniya nga mogukod gyud niadtong nagbuhat og ilegal , dili gyud kini makahuygo sa iyang barangay.
Busa gipasalig ni Tumulak nga kun anaay mapalgang video karera, masiao ug tigbakay ug illegal nga drugas sa Labogon, dili kini niya lung-an hangtod nga mapriso ang mga malapason sa balaod. (BANAT NEWS)