Gitabangag luba mga 'agaw patay

CEBU - Gitabangan og dunggab hangtod nga namatay ang 27-anyos nga lalaki sa iyaha ra usab mga ig-agaw diha sa San Vicente barangay Tunghaan, Minglanilla niadtong Domingo sa alas 6:30 sa gabii.

Ang biktima nga dead on arrival sa Minglanilla District Hospital mao si Jessie Padayao, 27, molupyo sa nahisgutang lugar samtang ang mga suspek mao sila si Ian Padayao ug Efren Padayao del Socorro, 21, ig-agaw ra sa biktima.

Matud ni PO2 Edsel Recablanca sa Minglanilla Police dihang nahinabi sa Banat News naglakaw ang biktima pauli dihang giatngan sa mga suspek ug gitabangan og kulata ug sa pagkatumba niini gitabangan nila og dunggab sa nagkalain laing bahin sa kalawasan niini.

Nadala pa sa Minglanilla District Hospital ang biktima apan gideklarar kining patay na paghiabot.

Kagahapon sa buntag boluntaryong nitahan ngadto sa kapitan sa barangay Tunghaan nga si Jeremias Cañares ang suspek nga si del Socorro ug nagpahatod sa kapulisan.

Samtang ang laing suspek nga si Ian boluntaryo usab nga nitahan kagahapon sa udto sa Minglanilla police station.

Dugang nahipos nga impormasyon sa kapulisan nga nagkabangi ang biktima ug pamilya sa mga suspek may labot sa pagpamuhi niini og mga baboy nga gireklamo sa kabaho sa mga hugaw niini.  (BANAT NEWS)